第二次參加紀念六四的長跑，記得去年有50-60人出發，跑足全程的跟紀念的年數一様 – 19個。
或者今年是20週年，心理上覺得有些特別意義，報名人數多了，出發的有70名左右，最年長的72歲，最年幼的11歲；集合時加埋那些拉Banner影完相走人的，大大話話過百人聚集。
其中公文袋就最為明顯，袋巾跟徒弟余冠威一早就到，文裝一度四圍吹水，還叫了班很學生模様的青年公文袋四處當攝石人。不過都好，總算有代表真正落場跑，還很主動的帶頭，不過開波唔夠10分鐘，過了中銀/PP之後近李節街，該名代表返到屋企樓下，任務完成上樓了，雖然無期望這位人稱酷似周迅的小姐跑到全程，但到維園先走都唔係好難之嘛，記者跟到維園先散喎…
到維園，Y89大學生(89年出世，今年Yr. 1那班)走了一大半，坐車到山頂趕下場 – 親子漫步的起步，聽聞果邊報名人數幾多，但甩底的更多，天氣不穩吧？加埋趕兩場的都有50-60人。
長跑的只剩30多個，而且堅持到最後，比預想的多，甚至驚喜的在維園和馬場繞圍也吸引到其他慢跑者加入支持；又由於天氣涼爽，跑得頗為輕鬆，只是臨尾過了禮賓府才開始毛毛細雨，比預定到達港大匯合親子漫步隊伍時早近半小時，反倒過來等他們，最年長和最年幼的參加者都完成，非常順利。
親子漫步又真的很多小朋友參與，匯合後兩批近100人在簡單儀式後向中聯辦邁進，就在上黃克兢大樓條樓梯度開始氣氛逆轉，先是早上專程拍照的公文袋小將再度出現，一早報了名話參加又No Show的長毛帶著支持者和大聲公出現，本來大家都幾安靜，只是打算沿途喊喊口號，但佢猛咁話無氣氛，堅持用大聲公，不過唔係自己嗌，只係播以前錄定的MP3口號，搞到鬼殺咁嘈…
唔好話夾定一人帶一Part呀！無聽過喎！不過毛哥搞寸個場還搞寸個場，好過佢老友姑爺仔直頭失踪！
之後去到西區警署，早就商量好做場大龍鳳話警察力阻無效，被迫放我們到中聯辦，條友又鬼上身咁亂叫，又話放火又話盛，場面有點失控，唯一好處是嚇到班青年公文袋即刻後閃…
咁最後都去到中聯辦正門擺放個民主女神，和平散去。
講起攝石人搶鏡，好激氣，同行某某由籌備、試跑到正式都全力參與，每次有相機被人搶位又唔走去爭，已替他大部份時間擔著一支直幡等有機會時轉手，但轉手無耐就交俾第二個老友，睇返批相，我出鏡重多......
但諗深一層，這種不出風頭正是他可愛之處......
(劇情需要，警察叔叔做戲做全套，亞爺怪罪時捱少兩棍)
(還有一段毛哥Solo，無謂貼囉...)
