屋企有錢真好

一向支持彭浩翔執導的電影，因為題材不是很本地化就是將一件不起眼的事以另一角度去表達出荒謬，引發趣味，黑色幽默笑中有淚。亦可能因為都是無大場面，純賣橋的電影，他的票房一向麻麻，叫好不叫座。

自《破事兒》後沉寂了一段頗長時間，4月份上了齣《志明與春嬌》，5月份旋即又上多齣《維多利亞一號》。

《維》片是導演有感香港樓價的瘋狂而拍的，為襯托瘋狂的故事背景，拍了個瘋狂的虐殺故事。雖然明知內容是血腥變態，入場前已有心理準備，看完也有點：「使唔使玩到咁呀？」的疑問。

故事集中在何超儀飾演的鄭麗嫦身上，一開始的場景是在私人屋苑的保安室內執行她的殺人大計，中間間場以回憶交待為何會變成這様。

性格執著的她為了孩童時青梅竹馬友伴的回憶，想買下友伴被迫遷後重建的豪宅單位，儘管這個豪宅盤是她這個銀行小職員負擔不起的，仍堅持無視其他買得起的樓盤，死慳死抵的儲首期，最後甚至連久病在床的老父病發也狠下心腸不理，以取得保險金才湊夠錢，但簽了臨時買賣合約後投資者業主寧願賠訂也要提價重賣，這給她沉重的打擊，決意令豪宅變凶盤讓樓價大跌再執平貨。

說她是精神失常又不似，因為計劃得很有系統，先入保安室幹掉保安員取走閉路電視的錄影硬盤才行事。第一家的受害人是想買的單位隔鄰，變凶宅後左右的單位肯定跌得首當其衝；之後再殺樓上嘈吵單位的人是想到搬進後會吵住得不安寧，故順手做埋，殺人方法不提了，總之是殺了10多個人，而她亦順利逃脫並得償所願。

電影最後一節何超儀站在豪宅窗台前一幕深得我心，電視/收音樓傳來金融風暴樓市爆煲的新聞，其實等多一陣就冧市，傷害了10多條人命變得無意義，是對主角最大的諷刺。

瘋狂的故事 + 荒謬的結局，很切合彭導的風格，不過實在很難會介紹別人入場，所以拖到落哂畫才提下。

票房方面不用擔心，老闆正是當主角的何超儀，報導說老父給了她1億搞電影，輸哂就請佢對演藝事業死心，頭炮就整齣口味如此重的，商業角度看這1億也凍過水，但創作角度則值得鼓勵，身為地產建設商會中堅成員的女兒對地產商批判得毫無忌諱，應予表揚。

題外話，早幾天居然見到一個西環樓盤跟片名非常相似，好像開12000元一呎…

(預告片拍得像樓盤廣告一樣, 陳冠希好像原本有份客串的, 上映時Cut哂)

太子鳳城酒家

早幾天到了太子的「鳳城」晚飯，點的多是煎炸食物，水準不錯，沒有失望；不過服務參差，有埋怨客人訂位時不提醒佢要問客人預訂菜式要早出聲的侍應；也有熱情但口多愛搭嗲的...

招牌乳豬略嫌肥美，新斗記好過佢；爽口的滷水生腸是本晚冠軍，兩款每碟118

百花鮮蟹鉗要預訂喎，42蚊一隻2隻起，確實幾足料，個醋汁亦夠醒胃；鍋貼大明蝦即係蝦多士，係個包底油咗少少，整體不錯。

香燒伊麵夠乾身，不過真係好齋，磨菇/冬菇都唔多粒，咁蹺有魚香茄子煲，正好撈埋一齊。

金銀桂花魚卷本來十分期待，但上到嚟個賣相同諗的不一樣，究竟捲了些甚麼呢？以為會用魚片捲住配料拮支牙籤咁....至於味道，ok的；大良炒鮮奶最遲先到，到這個階段已有點滯，不評分。

本來甜品要焗布甸的，不過賣哂無得食，淨係食送的紅豆沙算數。

呢張就係要預先訂的菜單，要客主動提先會記得通知，上到嚟先叫係會被責怪的，有無得食要睇彩數添。

炒魷

某會議末段有以下對話。

某甲：「離投票尚有兩個禮拜，義工人手嚴重不足，落區街坊反應並不積極，未來要加緊宣傳，向他們解釋為何要投票。」

某乙：「既然街坊反應並不積極，在鼓勵投票時強調是投『議題』，非投『候選人』，即係講多點跟大專生的票一齊計，若果唔滿意社民連，投大專生一様，再唔係，投白票都得，總之目標擺在催谷投票率。」

某丙：「投白票就無意思啦，任人點解讀都得啦！」

某乙：「咁…一開始話唔係選舉，係『公民教育』，最緊要表態丫嘛…」

某甲：「雖然話計埋一齊，但呢個說法都係權宜之策，盡可能都係叫返街坊投我哋啦。」

不知某丁或某戊和應：「大專生的作用係確保成局，況且落區的反應對計埋一齊都好有保留…」「呢班人對應重差過我哋自己友，我哋邊個邊個都『勁』佢哋好多啦！入到去都係做唔到嘢！」「萬一亞爺堆票落亞邊個邊個度，分散票源咪好大劑？」

某乙：「其他區唔係咁喎…」

部份持某乙相近意見的低聲咕嚕：「又話輸贏唔重要…」「咁就唔係投議題啦…」

某甲打圓場：「無錯係投議題唔係投人，其他區可能無事，但呢區目前情況不明朗，催谷唔到投票氣氛只好將資源集中返一方，免得讓對手有機偷雞；我個人輸贏真係唔重要，最大損失……(下删幾百字)」

某丙總結：「再提一次，我哋口號係『撐大X‧撐社民連‧撐公投』(之後好似還有句咩『民主有前途有出路』云云)，淨係呢句得喇，人手唔夠唔好自己嗌咪，派傳單就算，有MP3呀、喇叭就借出來用，資源唔夠無辦法；萬一有人搞事就等多人圍觀先同佢理論，講咩有聽節目照搬就得，記住唔好打架…」

某甲又道：「又唔好咁Hard Sell，唔使講撐我喇，另外記得叫多D朋友幫手做Polling Agent同Counting Agent，百幾個票站要成5-6百人，呢個係好難得的學習機會，可以近距離了解選舉運作……(下删幾百字)。今晚辛苦哂大家。」

之後散水，當晚接近12點，收到某丙來電話某甲指大家風格唔係咁啱，都係唔使幫手了…

今早，介紹人打過來話Say Sorry，無乜大不了，唔係無風聞某甲的作風，不會因仰慕佢而幫手，會答應只是以為為件事好同埋貪近，又想接觸下九東以外的人，而且九東實來談不上有氣氛，所以先推了某熟人的邀約，瞞住佢返自己住果區玩。

總之，今次張票就一定會投，其餘兩年後睇下邊個同邊個計數。