串爆食肆巡禮(一) - 港島代表

連續三篇都是雜誌的介紹，講的是唔憂做的食店。有幾間都慕名去過，都不覺得真係咁串，食物方面，可以說賣粥的真的不錯...

@@@@@@@@@@@@@@@@@@@@@@@@@@@@@@@@@@@

串、招積、唔憂做、甚至服務態度惡劣都是她們的風格。一般無斤兩的食店因此早已執笠。

偏偏她們其門如市，說穿了是食物出色，有本事讓人舌頭就範。

港島代表

愈惡愈爆場 ─ 金峰

雖然只是街坊粥店，但想入金峰食碗粥也不是易事，午市起碼要等30個籌，星期日更多達50個籌，而且未齊人絕不准入座，就是熟客也沒情講。

由於食物出色，生意唔憂做，金峰的服務亦劣跡斑斑。這店由梁生一家人一腳踢，但個個無乜表情。有客人出聲問要等幾耐，梁太不單止不表歉意，還反唇相譏：「要食就要等。」又試過有食客在等候外賣看報紙，結果錯過自己的號碼，結果被冷言「得」一句「掛住睇報紙，叫又唔聽。」總之客人來到就要循規蹈矩，不管是等位還是落單，未輪到的食客要乖乖等點名，否則梁氏一家會當你透明。

如此服務，還是人山人海，食物水準當然極高。雖然只有魚片滑牛等十多款大路選擇，但材料日日即買即切即醃，非常新鮮，配搭粥底濃稠適中、綿密柔順，入口極有米香。

小食也很出色，炸兩的腸粉即叫即拉，薄得透光，油炸鬼每15分鐘出爐一次，香脆鬆化，就連醬油都自家調製，入口甜香。最好還是價錢，平均消費不過20多元，以水準而言實在超值，難怪越罵越旺。

金峰靚靚粥麵

地址：鰂魚涌祐民街2號地下
電話：從缺
營業時間：7am-6:30pm

 

串過蘇施黃 ─ 蓮園

跑馬地蓮園的粥麵一向出名，但若你自問面皮薄，怕招呼不周，即使食物有幾正都敬而遠之的話，請不要來。因老闆娘「唔係人咁品」，說話粗聲粗氣、無尾音，經常黑口黑面。

次次來，全店二三十個座位坐滿客人，卻人人粒聲都唔敢出，怕隨時辣著她。有次見她罵女客人：「頭先問你要唔要筷子，又話唔要，而家又要我拎！」

跑馬地名人明星特別多，她卻一視同仁，招呼照舊、埋單照收，據聞就算出名巴辣的蘇施黃她一樣照串。但串還串，名人明星也紆尊降貴來幫襯，名媛陳細潔會來食裹蒸糉，樂基兒又日日來買煲仔飯，因食物水準有番咁上下。像老火粥，每日熬五六小時，白滑綿綿，夠火喉，還有炸兩，放幾耐也一樣脆卜卜。其他粉麵小菜也很足料。

老闆娘說話粗聲粗氣，但客人、夥計都知這是她的真性情，已見怪不怪了。

蓮園粥麵小廚

地址﹕跑馬地成和道51A，D鋪
電話﹕2891 5567
營業時間：10:30am-2am